Héðan frá Lundi er allt gott að frétta. Það gerist svosem ósköp litið þessa dagana, við lærum, borðum, sofum og förum í skólann. Hjalti er á fullu í próflestri. Hann fer í tvö próf á miðvikudaginn og svo tvö próf í næstu viku. Ég er nú orðin frekar spennt að koma heim eftir bara 10 daga (er meira segja byrjuð að pakka, en bara smá) og hugurinn er á Íslandi.

Var nú reyndar í fríi núna um helgina og fór í smá verslunarleiðangur út í Nova Lund (verslunarmiðstöð). Náði nú að eyða smá pening í H&M en það er ekki eins gaman að fara í H&M núna því að ég get alltaf skroppið í búðina. Allt annað þegar maður þarf að fljúga yfir haf til þess að fara í H&M. Svo var ég líka kisupössunarpía fyrir bekkjasystur mína, þannig að ég fékk aðeins að kúra með Elvis (kisunni) á laugardaginn. Versta var að hann prumpaði svakalega mikið en ástæðan fyrir því er að hann fær ekki alvöru mat heldur bara Whiskas og það er eins og við myndum borða hamborgara og franskar alla daga.

Hér er nú ekkert svakalega jólalegt, svíin skreytir nú ekkert mikið og þá bara með hvítum seríum, aðventuljós og stjörnur – það verður allt að vera svo stílhreint hjá þeim. Auk þess slökkva þeir svo á jólaseríunum á nóttinni. Borgin skreytir líka bara með hvítum perum og það er slökkt á þeim skreytingum yfir daginn en kveikt á þeim þegar það fer að rökkva og á nóttunni.

Var að byrja í nýjum áfanga í dag, meðferðafræði með hugræna áherslu, skemmtilegast við þann áfanga er að sá sem er aðalkennarinn er íslendingur. Þetta er mjög áhugaverður áfangi en verð nú líklegast að læra smá í jólafríinu.

Uppdate: það er ekkert að frétta af húsnæðismálum hjá okkur. Búum ennþá hjá Svajunasi og fötin okkar eru ennþá í ferðatöskunum og allir kassarnir með dótið okkar hjá foreldrum hans Hjalta.

Hugsa nú að bloggið fari í jólafrí núna þar sem við erum að fara að hitta flest ykkur sem lesa þetta blogg bráðlega.