Jí minn eini, tíminn líður svo hratt og ég er næstum því búin með eina önnina enn, 4 ár í sálfræðinámi hugsa sér. Á bara tvær litlar skýrslur eftir og nokkra tíma og svo er það bara Ísland hið góða og vinna á fullu. Reyndar förum við mamma í heimsókn til Lydíu systur sem er búin að vera í Lúxemborg frá því í janúar að passa börn. Nú er hún reyndar komin til Þýskalands eða við landamærin á milli Þýskalands og Lúxemborgar skilst mér. Ég hitti mömmu i Köben á föstudaginn næsta (15 maí) og við verðum á ferðinni í 5 daga. Svo kem ég heim (Svíþjóð) í smá stund og slappa af og hver veit nema ég þjónusti hinn námsmanninn á heimilinu sem er þá á fullu í prófalestri.

Af hendinni minni er nú ekkert sérstakt að frétta, er á fullu í sjúkraþjálfun og vona að ég geti keyrt bil í sumar án þess að vera stórhættuleg í umferðinni enda felst mikill hluti af yfirleiðbeinenda starfinu (vinnan mín) í að keyra á milli staða og tala í símann (auðvitað með handfrjálsan). Að skammast og stjórnast, sem er annar stór hluti af starfinu (og ætli ég sé ekki bara frekar góð í því), get ég alveg gert án hægri handar en ég verð að komast á milli staða til þess að geta sinnt því.

Tengdó komu í heimsókn 1 maí og við fengum þetta yndislega veður og svo þegar þau fóru kom bara rigning. Við keyrðum um Skåne og þau sýndu okkur (mér) nú meira heldur en við gátum sýnt þeim enda hafa þau nú búið lengur á þessu svæði en ég (Hjalti bjó náttúrulega hérna þegar hann var lítill og kannaðist við flest svæðin sem við skoðuðum). Þau mæla með gistiheimilinu á Kjammanum 8 B117 þannig að þeir sem vilja kíkja til suður Svíþjóðar ættu endilega að nýta sér það.

Hlakka mikið til að koma heim, knúsa kisurnar mínar og kannski einhverja fleiri. Hugsa að það verði lítið um bloggfærslur í sumar en síðan verður nú alla vegna virk aftur í haust svo að allir geti fylgst með okkur hérna í Svíþjóð.

Set inn nokkrar myndir frá maí.